頌

今日係我牛一。我要歌頌我呢幾年同幾位知心好友o既情誼。

話說今日同呢排好耐冇見o既小露寶食永年，講番以前往事。往事不離足球。我從來未忘記我地點樣係馬田五人場踢爛仔波，由一開始o既贏一球輸兩球，變做先輸一球贏兩球，有時同隔離中學班人踢，有時同啲阿伯踢，距離宜家，已有七八年。馬田足球場已經比政府拆左，話要起唔知乜野大樓。但係o係我心中o既記憶，永遠都唔會消失。

記得有一次踩單車由元朗去屯門，去到龍鼓灘我炒左鋪勁，崩牙流血，加上果時係醫學院都唔好開心，當時真係好無助。多得呢班友照顧我，帶我去醫院，我今生今世都無以為報。

光陰似箭，大家個樣都變左，我讀醫多年，已經變成一老頭。人間無常，好多事情都不由我地左右，唔到我地控制。你睇，吹水茶座個肥仔老細一轉眼就唔見左，馬田個足球場話拆就拆，趙中話唔掂就唔掂……我但求我地之間o既關係始終如一，你地令到以前o既我變成今日o既我，我願我未來o既日子都有你地o係我左右。我不敢想像如果冇你地，我會變成點，更加唔敢諗如果我冇左你地，我日後點算。

最後我以阿里士多德一句話作結，佢話友情：Love is composed of a single soul inhabiting two bodies. 愛情可能係短暫，但友情係恆久o既。

我相信。